[Book Review] Ang Nawawala ni Chuckberry J. Pascual



Matagal ko na itong gustong basahin. Bukod kasi sa interesante ang premise ng mga kuwento sa koleksiyong ito, pakiramdam ko rin ay marami akong matututunan dito pagdating sa pagkukuwento sa Wikang Filipino. Kaya naman, noong magkaroon ng pagkakataon na bumili ng kopya sa Lazada bago pa man ang Aklatan 2020 online book fair, sinunggaban ko agad ito.

Hindi naman ako nagkamali. Marami nga naman akong natutunan dito. Isa sa mga gustung-gusto ko rito ay ang gamit ng wika. Napakasimple nito't kayang-kayang abutin ng mga hindi sanay sa malalalim na salita. Hindi rin ito tunog luma. Sa katunayan, ang kaswal ng tono ng buong koleksyon at pakiramdam ko'y kinukuwentuhan lang ako ng isang kaibigan o isang certified chismosa sa aming barangay. Sa tingin ko, nakatulong ito para mas mapausad ang kuwento. Dahil swabeng-swabe ang wika, mas swabe rin ang takbo ng mga pangyayari.

Siyempre, naaliw din ako sa mismong mga kuwento at sa mga tauhang hanggang sa dulo'y nasubaybayan ko. Lalo na si Bree! Kung totoo lang ang Talong Punay, aba'y didiretso ako sa barangay hall at aayain siyang magmeryenda para maging close din kami.

Ang gusto ko kay Bree, kitang-kita ang pagiging "totoong tao" niya. Makikita sa iba't ibang kuwento na sa kabila ng angking kabutihan ay mayroon din siyang mga kahinaan. Mapagpasensiya siya, pero kung minsan ay napipikon din. Mabait, pero grabe magalit. Hindi rin "black and white" ang pagtingin niya sa mga bagay. Sa tingin ko, mas makikita ang aspektong ito ng kaniyang pagkatao sa "Ang Nawawalang Singsing," kung saan kinailangan niyang gumawa ng isang desisyong hindi madali.

Sa madaling salita, kumplikadong tao si Bree. At sa patuloy niyang paggalaw sa Talong Punay habang pumapapel sa mga imbestigasyon sa barangay, sadya man o hindi, matutunghayan din ang patuloy na paglago niya bilang isang indibidwal.

Tuwang-tuwa rin ako sa takbo ng mga kuwento sa librong ito. Kaabang-abang ang mga sandali, lalo na sa tuwing nagsisiyasat si Bree tungkol sa mga nawawala sa kanilang lugar. Naroon iyong excitement na kadalasang nararamdaman habang nanonood o nagbabasa ng kung anong may kinalaman sa mystery. Bilang mambabasa, hindi maiwasang mapahula ka rin talaga sa kung ano'ng totoong nangyari. Mas masaya ring sundan ang mga pangyayari dahil magkakaugnay ang mga kuwento at umiikot lang din sa iisang komunidad.

Pero bukod sa mismong mga tagpo, nagustuhan ko rin ang tila komentaryo na mayroon sa buong koleksiyon. Sa tingin ko kasi, maraming bagay sa Talong Punay ay repleksiyon ng iba't ibang aspekto ng lipunang ating ginagalawan. Nariyan ang mga korap na opisyal ng barangay, diskirminasyon laban sa mga miyembro ng LGBT community, problema ng kahirapan, animal cruelty, at iba pang mga problemang kinakaharap natin sa araw-araw. Makikita ring kung paano ito harapin ng mga tauhan ay di nalalayo sa kung paano dumidiskarte tayong mga Pinoy para lang makaraos. Hindi ko tuloy maiwasang mapaisip ng kung anu-ano pa tungkol sa lipunang kinabibilangan.

(Larawan mula sa goodreads)
QuickEdit
Mina Deocareza
0 Comments